Munaðarleysinginn

Munaðarleysinginn eftir alþýðurithöfundinn Theódór Friðriksson er áhugaverð smásaga þar sem við fáum ofurlitla innsýn inn í líf fátæks alþýðufólks í upphafi tuttugustu aldar. Theódór sjálfur var af fátæku fólki kominn og þurfti alla tíð að strita fyrir afkomu sinni og skrifar því af ákveðinni reynslu. Er það með ólíkindum hvernig þessum nánast ómenntaða alþýðumanni sem bjó við kröpp kjör tókst að skrifa jafn eftirminnileg verk og raun ber vitni. Um margt má segja að sagan minni á sumar sögur Gests Pálssonar nema hvað stíll þeirra er frábrugðinn, en hvað efni og innihald varðar er þarna töluverður skyldleiki. Kunnasta verk Theódórs er án efa hin stórkostlega sjálfsævisaga hans Í verum sem einnig er aðgengileg hér á Hlusta.is. Ingólfur B. Kristjánsson les.