Á flögri með Ólöfu Rún: 4. Aðalheiður Auðunsdóttir

Þátturinn Á flögri með Ólöfu Rún er samvera með Íslendingum í leik og starfi. Allir eiga sögu. Eins og fugl á flögri setjumst við niður og heyrum sögubrot í notalegu spjalli. Hvers vegna lá lífsleiðin í þessa átt en ekki hina og stundum leynast spurningar um allt annað en aðalstarfið með. Notalegt spjall og samvera er hugmyndin að baki þáttunum. Umsjón: Ólöf Rún Skúladóttir. Þeir eru fáir sem alist hafa upp þar sem enginn komst nema fuglinn fljúgandi, lágfóta eða ferðast þarf sjóleiðina til að hitta mann og annan. Viðmælandi okkar í þessu flögri býr yfir lífsreynslu sem ekki er á hverju strái. Aðalheiður Auðunsdóttir kallar sko aldeilis ekki allt ömmu sína þótt hún sé löngu orðin amma. Hún hefði vafalítið sómt sér vel í villta vestrinu en í raun má segja að þar hafi hún einmitt verið.